ﮨﺘﮫ ﭼﮭﻮﮌ ﮐﮯ ﮔﻞ ﮐﺮ ﻏﯿﺮﺕ ﻣﻨﺪ

ﻣﯿﮟ ﮐﻮﺋﯽ ﺩﻟﮕﯿﺮ ﻓﺤﺎﺷﮧ ﻧﺌﯿﮟ

ﭼﻠﻮ ﺗﻨﮓ ﺣﺎﻻﺕ ﺩﯼ ﺟﯿﻞ ﺍﭺ ﮬﺎﮞ

ﭘﺮ ﺍﻟﮩﮍ ﺷﻮﺥ ﺭﻗﺎﺻﮧ ﻧﺌﯿﮟ

ﺑﮭﮑﺎ ﻭﯾﮑﮫ ﮐﮯ ﺭﻭﻧﺪﮮ ﺑﺎﻻﮞ ﻧﻮﮞ

ﭘﮩﻠﮯ ﺑﮏ ﺑﮏ ﺍﺗﮭﺮﻭ ﺭﻭﻧﺪﯼ ﮬﺎﮞ

ﻟﻮﮐﯽ ﻭﯾﮑﮫ ﮐﮯ ﻣﯿﻨﻮﮞ ﮬﺲ ﭘﻮﻧﺪﻥ

ﮨﺮ ﻣﻮﮌ ﺗﮯ ﺟﺪﻭﮞ ﮐﮭﻠﻮﻧﺪﯼ ﮬﺎﮞ

ﻣﯿﻨﻮﮞ ﮨﺮ ﮔﺰ ﺷﻮﻕ ﺍﺩا ﺩﺍ ﻧﺌﯿﮟ

ﻣﯿﻨﻮﮞ کاسہ ﻭﻗﺖ ﻧﭙﺎﯾا ﮬﮯ

ﻣﯿری ﺩﺭ ﺩﺭ ﭘﮭﺮﻧﺎ ﻋﺎﺩﺕ ﻧﺌﯿﮟ

ﻣﯿﻨﻮﮞ ﺩﺭ ﺩﺭ ﺑﺨﺖ ﭘﮭﺮﺍﯾﺎ ﮬﮯ

ﻣﯿﮟ ﺟﺴﻢ ﻓﺮﻭﺵ ﻓﺤﺎﺷﮧ ﻧﺌﯿﮟ

ﺑﺲ ﺭﺏ ﺩﮮ ﻧﺎﮞ ﺗﮯ ﻣﻨﮕﺪﯼ ﮬﺎﮞ

نہ ﮐﺴﮯ ﺩﯼ ﺳﯿﺞ ﺗﮯ ﺳﻮﻧﺪﯼ ﮬﺎﮞ

نہ ﮔﮭﻨﮕﺮﻭ ﺑنھ ﮐﮯ ﻧﭽﺪﯼ ﮬﺎﮞ

ﺗﻮﮞ ﺷﮩﺮ ﺩﺍ ﺣﺎﮐﻢ ﮐﺠﮫ ﻧﺎﮞ ﺩﮮ

ﭘﺮ ﺍﯾﮉﺍ ﻏﻠﻂ ﺧﯿﺎﻝ نہ ﮐﺮ

ﻣﯿﺮﮮ ﺷﺮﻡ ﺣﯿﺎ ﺩﯼ ﭼﺎﺩﺭ ﻧﻮﮞ

ﺍﻧﺞ ﭘﯿﺮﺍﮞ ﮨﯿﭩﮫ ﭘﺎﻣﺎﻝ نہ ﮐﺮ

ﺭﮐﮫ ﺳﺎﻧﺒﮫ ﮐﮯ ﻗﺎؔﺳﻢ ﺩﻭﻟﺖ ﻧﻮﮞ

ﺩﻭ ﭨَﮑﯿاﮞ ﻧﺎﻝ ﺍﻭﻗﺎﺕ نہ ﻣﻨﮓ

ﻣﯿﮟ ﺳﺎﺋﻞ ﮬﺎﮞ ﮐﻮﺋﯽ ﮐﻨﺠﺮﯼ ﻧﺌﯿﮟ

ﺧﯿﺮﺍﺕ ﺩﮮ ﺑﺪﻟﮯ ﺭﺍﺕ نہ منگ