دوہڑہ

کمظرف انسان نوں سنگت دا قائدہ پہلی گل اے پڑنا ای نئیں چاہیدا

کسے راٹھ نوں مگر بے لجیاں دے بلڑے مچ اچ وڑنا ای نئیں چاہیدا

جداں مندا ایں ضد شیطانی فعل اے مڑ ضد تے اڑنا ای نئیں چاہیدا

صلح کرنی ہوے رشتے دے کے وت رستمؔ لڑنا ای نئیں چاہیدا

ڈھڈوں ڈھئے کے جدنڑ کریم توں منگیے کر سوچ توں ڈھیر عطا دیندائے

جیہڑے وہم گمان اچ نئیں ہوندے او سکھ وی جھولی پا دیندا اے

گھتے آدم واسطہ مدنیﷺ دا اسے ویلے میل کرا دیندا اے

لئے پھد تاں نکی جئی غلطی توں عالم ابلیس بنڑا دیندا اے

جیہڑا کردا اے کئیں دی عزت تے حملہ خود عزت دار نئیں ہوندا

بھانویں رستم ٹکرے مسجد وچ اوہدا کوئی اعتبار نئیں ہوندا

بندے عزت دار نوں کئیں قیمت زر نال پیار نئیں ہوندا

دسے کونڑ کمینیاں بندیاں نوں سانگا کاروبار نئیں ہوندا

رونق محفل