دوہڑہ
ڈنگ رستمؔ عاجزی نال نبھا بھاندے نؤں مغرور خدا نوں
ہئی قائم ایمان تاں کیوں سمجھیندا ایں شہہ رگ توں دور خدا نوں
ساڈی سونپنڑی کیتی اے رو رو کے میرے پاک حضورﷺ خدا نوں
اساں ہک نہ ہک ڈینہہ مل پونڑاں ایں ہویا جے منظور خدا نوں
Punjabi Poetry, Urdu Poetry, Islamic Poetry, Naat Sharif, Romantic Poetry, Sad Poetry, Funny Poetry, Islamic Novels, Jasoosi Novels, Romantic Novels
ڈنگ رستمؔ عاجزی نال نبھا بھاندے نؤں مغرور خدا نوں
ہئی قائم ایمان تاں کیوں سمجھیندا ایں شہہ رگ توں دور خدا نوں
ساڈی سونپنڑی کیتی اے رو رو کے میرے پاک حضورﷺ خدا نوں
اساں ہک نہ ہک ڈینہہ مل پونڑاں ایں ہویا جے منظور خدا نوں
ڈھڈوں ڈھئے کے جدنڑ کریم توں منگیے کر سوچ توں ڈھیر عطا دیندائے
جیہڑے وہم گمان اچ نئیں ہوندے او سکھ وی جھولی پا دیندا اے
گھتے آدم واسطہ مدنیﷺ دا اسے ویلے میل کرا دیندا اے
لئے پھد تاں نکی جئی غلطی توں عالم ابلیس بنڑا دیندا اے
جیہڑا کردا اے کئیں دی عزت تے حملہ خود عزت دار نئیں ہوندا
بھانویں رستم ٹکرے مسجد وچ اوہدا کوئی اعتبار نئیں ہوندا
بندے عزت دار نوں کئیں قیمت زر نال پیار نئیں ہوندا
دسے کونڑ کمینیاں بندیاں نوں سانگا کاروبار نئیں ہوندا
بھکھے بشر نوں کجھ نہ دے کے بھنڈنڑاں رسوائی دی حد نئیں مک گئی
کٹھے پنج پنج قتل وسیب دے وچ جنڑیائی دی حد نئیں مک گئی
سنڑیں جتیاں مِلُخ جنازے پڑھدائے وڈیائی دی حد نئیں مک گئی
کتے کھوجی بنڑ گئے رستم جھایا بندیائی دی حد نئیں مک گئی
ٹھپے راہنڑ دے درؔد رَسائی دے ورقے وَت چھیڑ نہ ذِکر پُرانڑے
سئے مُدت دے بعد اَساں کملیاں دا ہُنڑ آیائے ہُوش ٹِکانڑے
رُسوائی دے قفس دے مُٹھیاں نوں گھت نئیں لالچ دے دَانڑے
تیری نسل تے وِسنڑ حرام دی موت اے اُوہ بھُل وَنج وقت وِیہانڑے
مہر غلام محمد درد
جیہڑا عشق توں باہر نماز پڑھے اوہدا ٹھیک مصلی ای کئی نئیں
جیہڑا عشق تے مذہب دو سمجھے اہدے ورگا جھلا ای کوئی نئیں
سدھی گل اے قاؔسم سمجھ تاں سئی میری گل اچ رلا ای کوئی نئیں
جس دل وچ حب نئیں پنج تن دی اس دل اچ اللہ ای کوئی نئیں
اس دور جدید دی منڈی وچ مسیں عزت بچا کے ول آیاں
ہر خواہش نوں صبر دی سولی تے پُٹھا میں لٹکا کے ول آیاں
میں وی راز ترقی گھنڑ گیئم فوراً پچھتا کے ول آیاں
او پگڑی ویچ کے ڈھیندی ہائی میں لعنت پا کے ول آیاں
گندے ذہن دے آکھے لگ کے گندہ روز ضمیر کریندا ایں
روندے چھوڑ کے بال نمانڑیں راتاں چکلیاں وچ گزریندا ایں
ماں تیری ہمسایاں کولوں آٹا روز ادھارا منگے
توں بہناں دے کنگنڑ دے کے جوا کاوؔش کھیڈ چھڑیندا ایں
تن تنہا کفار دے وچ سارے فرض ادا کر گئی اے
رج کے ساری دنیا کولوں کفر دے منہ تے لعنت پئی اے
برقعے کانڑ اسلام نوں کاوؔش کیڈی نڈر شہزادی ڈھئی اے
جیہڑی جان تلی تے چا کے پردے واسطے لڑدی رئی اے
جیویں بیوہ اکھ چوں اتھرو ڈھاندن میرے مولا کجھ سنڑوائی کر
کشمیر اچ میرے ویر پئے کسدن ابابیل دی فوج منگائی کر
اگے زخم ہن تازہ شہ رگ دے نہ سال دے سال ڈکھائی کر
جے تائیں کشمیر آزاد نہ ہووے میرے وطن تے عید نہ آئی کر
کھلو اے گردش دوراں مقدر آزماونڑ دے
مینوں ہنجواں دے بلھیاں نوں اوندے در تے نچاونڑ دے
او عاؔبد دور بے شک ہے مناونڑ آگیا اے مینوں
توں خواباں دے سوالی نوں ذرا نیندر تاں آونڑ دے
توں اطہر میں بدکار ہاں میرے اللہ توں دو جگ دا مختار مالک ہکلا
نہ توں کئیں دا بیٹا نہ توں کئیں دا باپ ایں توں بے مثل ہئیں تے مثال اپنڑیں آپ ایں
توں مالک تے رازق تے مشکل کشا ایں سَمِیْعُ الْبَصِیْر ایں سَمِیْعُ الْدُعَا ایں
قبول اک گنہگار دی التجا کر مسلماں نوں ایمانی جذبہ عطا کر
مٹا دے زمانے تو فرقہ پرستی وسا ساڈے اجڑے ضمیراں دی بستی
بھٹک گئی اے امت تیرے مصطفیٰﷺ دی نہ رئی کئیں نوں پہچانڑ دھی دی تے ما دی
پیا اج بِھرا دا بِھرا خوں پیندااے تیرے جگ تے مفلس پیا اوکھا جیندا اے
تڑپدا پیا اے ساڈی غیرت دا لاشہ پئے ظلم ہوندن اِتھاں بے تحاشا
ختم جلدی گمراہی دی اے سزا کر جگا سُتے جذبے تے زندہ حیا کر
خدائی مخالف طرفدار کوئی نئیں تیرے باج ساڈا مددگار کوئی نئیں
قدیر ایں کبیر ایں تے غفار توں ایں اساں ہاں سیاہ کار ستار توں ایں
اساں پاپی عیبی اساں بھاویں جو ہاں مگر تیرے محبوب دے کلمہ گو آں
اُسے دے وسیلے کرم کر خدایا ہے مطلوب ہنڑ تیری رحمت دا سایہ
اسیں بنٹر کے رہ گئے آں دشمنڑ دا ہاسہ دسیندا نہ تیرے سوا کوئی پاسہ
ایہا درؔد دی عاجزانہ دعا اے اساڈے دلاں توں سیاہی مٹا اے
چا دے قوم مسلم نوں کامل ایمان اے وطن دا محافظ بنڑا ہر جوان اے
سوائے تیں توں کافر دا ڈر رہے نہ پالہہ رہوے جگ تے اسلام دا بول بالا
اساں کداں ہنڑ تہاڈے لائق دے رہے آں تہانوں ہور کھڈاونڑیں جھل گئے
تساں ڈھنگر دھریک کے کی کرنن سکھ جدنڑ تہاڈے پھل گئے
ساڈا خالص تیل وی کم نہ آیا تہاڈے سکے پانڑی بل گئے
افسوس حیاؔت اداں کنڈ کیتی اوئے جداں پیار جوانیوں ڈھل گئے
حاجی محمد حیات بھٹی
ساڈے پیار پچھیتیاں فصلاں ہن کدی اجڑ گیا کدی پھل لگ گئے
اسے کئی ڈیونہہ شوق دا کھیڈ لیا جیہڑے شاہ دے دل نوں ول لگ گئے
ارمان توں نکلیاں ہنجواں نوں کدی لڑھ ہئے گئی کدی ٹھل لگ گئے
روح جدنڑ حیاؔت اداس ہویا جھٹ اپنڑیں آپ دے گل لگ گئے