نعت شریف
فخر کون و مکاں کملی والا میرا جس دی خاطر دو عالم سنوارے گئے
ایسا نور ہدایت ہے آقا ﷺ میرا در تے جیہڑے وی آئے بن ستارے گئے
اولیں آخریں دا ہے میرا نبی ﷺ سب نبیاںؑ رسولاںؑ اتے برتری
ہاں ازل تو قسم اے ازل دے ولوں مصطفیٰ ﷺ نوں دتے شان بھارے گئے
نوریاں شہشاہ پچھاں رہ گیا پار عرشاں توں خیر البشر جا کھڑا
اے بلندی فقط مصطفیٰ ﷺ نوں ملی شب معراج نوں ہو نتارے گئے
چن دو ٹکڑے ہویا آیا ٹر کے شجر دتی پتھراں گواہی مٹھی دے اندر
پانڑیں انگلیاں چوں ایسا جاری ہویا پیاس بجھ گئی تے ہو سیر سارے گئے
نام سوہنڑاں ہے اس دا دو میماں والا بڑیاں تکریماں تے تعظیماں والا
جس دے اسم گرامی نوں چمنڑ کیتے میرے ہوٹھاں دے ملدے کنارے گئے
مرسلیں انتظاراں کریندے گئے مصطفیٰ ﷺ دیاں راہواں تکیندے گئے
آمنہ دے مقدر دی کیا بات ہے جس نوں بخشے اے سارے نظارے گئے
ہتھ چمنڑ دے محبوب ﷺ دے یار دا تو جو پہلا خلیفہ ہیں سرکار دا
تہانوں پڑھیا سی پہلے کتاباں اندر تینوں تکیاں ہو پورے اشارے گئے
جانثاراں ایسی جانثاری کیتی پونجی قربان گھر دی چا ساری کیتی
بچے سوئی وی کیوں تاہوں دیواراں تے پھڑ کے اپنڑیں ہتھیں دے بوہارے گئے
بوبکرؓ تے عمرؓ ذالنورینؓ و علیؓ ادوں عشرہ مبشرہ نوں عظمت ملی
جنہاں اقرار کیتا بلندی ملی جنہاں انکار کیتا او مارے گئے
جاواں قربان حسنینؓ دی شان توں کربلا دے شہیداں دے سلطان توں
مصطفیٰ ﷺ دے جگر وسدے تیراں تھلے پڑھدے قرآن دے تریہہ سپارے گئے
کر فضل مولا طاہرؔ گنہگار تے آکھاں ونج کے میں آقا ﷺ دے دربار تے
ہجر کھاندا رہیا دوری ڈنگدی رہی بے قراری بھرے دن گزارے گئے
شہادت علی طاہر جھنگوی
مختصر جائزہ
تعارف
اے نعت شریف حضرت محمد صلی اللہ علیہ وآلہ وسلم دی شان و منزلت تے اوہناں دی امت تے کیتیاں گئیاں نعمتاں دا اک خوبصورت بیان ہے۔ نعت گو نے رسول اکرم ﷺ دیاں صفات، فضائل تے معجزات نوں نہایت عمدہ انداز وچ بیان کیتا ہے۔
موضوعات
رسول اکرم ﷺ دی نبوت تے رسالت دی برتری کہ آپ ﷺ تمام انبیاءؑ اور رسولاںؑ توں افضل تے بلند شان اور مقام والے ہن۔ اللہ تعالیٰ دو عالم نبی پاک ﷺ دی خاطر پیدا کیتے ہن اگر آپ ﷺ نوں پیدا نہ فرمانڑاں ہوندا تے اللہ پاک دوجہاناں وچ کوئی چیز وی پیدا نہ فرماندے۔ حضور اکرم ﷺ ہی مقصود کائنات ہن۔
رسول اکرم ﷺ دے معجزات، جنہاں وچ شب معراج، شق قمر، تے انگشت مبارک وچوں پانی دا جاری ہونا شامل ہے۔
واقعات جیسا کہ یمن دے بازار دا واقعہ، اسلام دی خاطر آپ ﷺ دے تمام صحابہؓ اور بالخصوص حضرت سیدنا صدیق اکبرؓ دی جانثاری اور اپنڑے گھر دا سارا مال حضور ﷺ دی خدمت اقدس وچ پیش کرنے دا واقعہ اور واقعہ کربلا دا ذکر۔
سیدنا حضرت محمد ﷺ دے صحابہ کرامؓ بالخصوص خلفائے راشدینؓ اور عشرہ مشرہؓ دی عظمت و شان تے بلند مقام و مرتبے دا تذکرہ۔
دعا شاعر اللہ تعالیٰ دی بارگاہ وچ عرض کردا اے یا اللہ میں گنہگار اتے فضل فرما اور مینوں آقا مدنی کریم ﷺ دے دربار مبارک تے حاضری دا شرف نصیب فرما۔
کوئی تبصرے نہیں:
ایک تبصرہ شائع کریں