مہر ریاض سیال پنجابی دوہڑے

1

کسے بال دے ویدھیاں نئیں لیندے کدی رشوت رشوت خور اے

بدمعاشی نہ بدمعاش کرن نہ چوری کردے چور اے

جس کھرباں ہا اکھیں ونڈیاں ہن کیڑی دی ویدھا ٹور اے

اوہدے ویہدیاں ریاضؔ مکالا ملیں اوہنوں انج جاتائی کمزور اے

مہر ریاض سیال

2

غیر اپنڑے دی پہچانڑ دسیں کر کتے دی تربیت

اوہ وی تیرے پیریں رول کے بوتھی تینوں کردن ہک نصیحت

جیندا کھاندا ہیں اسے ہک دا گا در در دی چھوڑ عقیدت

تئیں اس توں بھوکنڑ سکھ لیا ہے پر سکھی نئیں عبدیت

مہر ریاض سیال

3

جیویں تتلی سرخ گلاب دے وچ جڑ ویندی پتیاں نال اے

ایہہ وی محمل دے وچ ٹاٹ میں جڑیا رخسار دی کدنڑ مثال اے

جے رخ انور دیاں لاٹآں تے ولیل نہ بنڑدی ڈھال اے

والشمس دی لاٹ پچا ویندا ہا شمس دی کدنڑ مجال اے

مہر ریاض سیال

4

ہے والشمس چہرے تے مسکان ٹھاندی نہ یاقوتی مکھڑے تے ہنج روہڑیا کر

اٹھے پہر امت دا غم گاٹے لا کے نہ اپنڑاں نہ یاراں دا دل تروڑیا کر

میں چن ورگا چن تینوں دتا کھڈونڑاں جو انگلی دے تیرے اشارے تے نچدا

رہیا ولچیا کر اسے کھیڈ دے وچ کدی تروڑیا کر کدی جوڑیا کر

مہر ریاض سیال

5

برفی دا ڈبہ بیوی نوں جداں دیندا ایں ماں توں پاسے

دو جپ دے مارے بٹے کن تہاڈے سنڑدن ٹچکراں ہاسے

اکھ دے زم زم چوں ڈول بھرن ہڈھیں گلھ دے واہنڑ پیاسے

شالا اس جوڑے نوں خیص نہ آوے دھمیں ونڈدی اے روز پتاسے

مہر ریاض سیال

6

جیہدی ڈھاکھ تے تیریاں لوڈاں دے گھس اج تائیں یار بقایا

جس جھولی دے محراب دے وچ تینوں تھپکیاں نال سنوایا

تئیں فیڈر توں انکار کیتا اس چلیاں نال پوایا

اس بھینڑ دا حصہ کھا گیا ہیں تینوں کجھ وہ شرم نہ آیا

مہر ریاض سیال

7

جیہڑا ویہڑے سائیکلاں دھک دھک کے تینوں بھج بھج رہیا جھٹیندا

اسکول دے راہ تے جیہڑا جھونڑ کے بیریں وڈے بیر ہا تینوں دیندا

کوئی بال تینوں دبکائے ہا چا اوہنوں ہا گھر تیکھ چکیندا

اج اس بھرا نوں مرلے لئی ہیں تھانڑیاں وچ دھرکیندا

مہر ریاض سیال

8

جس گھر دی ریاضؔ وڑنڈی کائی نئیں نہ لنٹڑ نہ پرنالے

نہ کھڑکی روشندان نہ در نہ پہرو نہ رکھوالے

تینوں اس گھر دے وچ کیڑیاں دے کر آسن سجنڑ حوالے

سنڑے جتیاں باہسن قبر تیری تے تیری جتیاں پوجھنڑ آلے

مہر ریاض سیال